НА ВЕЛИЦЕЙ ВЕЧЕРНИ

На Господи, воззвах: стихиры, глас 5.
Подобен: Радуйся:
Радуйся, светозарный светильниче, / прогонителю мрака греховнаго, / преподобие отче наш Гаврииле, / Церкве Русския светолепное сокровище, / горы Афонския похвале говейная, / просвещающий верных сердца, // воспевающих святую память твою.
Радуйся, благочестия поборниче, / главо доброразсудная, / преблаженне отче Гаврииле, / яко из младенства сердцем к Богу прилепився, / светел ум твой к Небесным вперивый / и востекл еси в гору Афонскую, / яже бысть ти лествица в Царствие Владычне, / идеже ныне молишися // о славящих подвиги и труды твоя.
Радуйся, Божией славы ревнителю, / истовый служителю обители огнедухновенного пророка, / досточудне отче Гаврииле, / колесницею пламенных доброт своих / духом на Небо восшел еси, / сиры же ны не оставил еси, / но, якоже Илия Елисею милоть во утешение, / сице ты цельбоносныя мощи своя нам оставил еси, / любя по преставлении люди твоя, // блажащих достохвальное имя твое.
Радуйся, храмостроителю чудный, / благолепия церковнаго рачителю, / богочестне отче Гаврииле, / ты бо бодреливо телесем труждаяся, / непокоривую плоть духови поработил еси, / усердием своим боголепныя храмы Богу воздвизая, / благоустроен дом Святыя Троицы обрелся еси, / Еяже присно в себе имея, // моли о любезне почитающих тя.

Слава, глас 5, самогласен:
Воспоим в веселии сердечнем / преподобнического сонма велелепное украшение, / смиренномудрия деятельного учителя, / послушания и трудолюбия кротцее правило, / братии монашеской отца и игумена радетельного, / любомятежных духов невлаемаго посрамителя, / богомудрого и богоблаженного Гавриила, / да ниспослет Господь // его предстательством нам велия милости.
И ныне: Догматик, глас тойже:
В Чермнем мори / Неискусобрачныя Невесты образ написася иногда: / тамо Моисей, разделитель воды, / зде же Гавриил, служитель чудесе; / тогда глубину шествова немокренно Израиль, / ныне же Христа роди безсеменно Дева; / море по прошествии Израилеве пребысть непроходно, / Непорочная по рождестве Еммануилеве пребысть нетленна. / Сый и прежде Сый, / явлейся яко Человек, // Боже, помилуй нас.

На литии стихира, глас 2.
Подобен: Егда от Древа:
Егда от лютаго недуга / тя, отче Гаврииле, милостиво Господь избави, / тогда обет свой исполняя, / востекл еси на поклонение в Лавру Киевскую, / и лобызая всечестнии и духоноснии мощи / преподобных отцев, / житию и подвигам их поревновал еси, / любовию же ко Господу распалаемый, / вся красная мира во уметы вменил еси / и абие в пустыню стопы своя направил еси, // да Сладчайшаго Христа приобрящеши.
Слава, глас и подобен тойже.
Егда жезл скитоначалия / тебе, отче Гаврииле вручен бяше, / тогда преиспещренный венец благодеяний твоих / новыми каменьми драгими доброт украсися, / яко явился еси монахов богомудрый наставник, / смирения и кротости вящий блюститель, / немощей ближних безропотный носитель, / пастырю Христов истинный, / миролюбия и правды усердный хранитель // и присный молитвенник о душах наших.
И ныне, богородичен, глас и подобен тойже:
Егда при Древе Крестнем, / видяще Рождество Твое страстию уязвляемо, / Ты, Мати Чистая, презирала еси спасения таинство, / тогда усыновление со апостолом / приял есть род наш христоименитый, / иже ныне молится Тебе, Богородице, / во еже избавитися нам от греховных страстей, / друг ко другу любовь стяжати // и унаследовати Царство Небесное.

На стиховне стихиры, глас 2.
Подобен: Доме Евфрафов:
Доме Утешителя, / пречудне Гаврииле, / приими моление / чад твоих днесь собравшихся // и испроси нам велия милости.

Стих: Честна пред Господем / смерть преподобных Его.
Божий Ангели / с лики земнородных / во святых храмах тобою созданных / прославляют тя, // отче всечестне Гаврииле.

Стих: Блажен муж, бояйся Господа, / в заповедех Его восхощет зело.
Радуйся, Гаврииле, / преподобных славо, / трудолюбцев похвало священная, / православных прославление, // Церкве утверждение.

Слава, глас и подобен тойже:
Доме целомудрия, / приятилище чистоты и правды, / смиренномудрия сокровище, / Духа Божественнаго жилище, // поминай нас, память твою совершающих.
И ныне, глас и подобен тойже:
Доме Пречистыя, / уделе благословенный, / Русь Святая, / храни веру Православную, // в ней же тебе утверждение.
Тропарь преподобнаго, глас 6:
От суетнаго и многомятежного мира удалився, / к немерцающему свету горы Афонския притекл еси, / чистотою и говением, / молитвами и трудом прославил еси Бога. / Храмы православныя во славу Трисвятаго имене Его воздвигл еси, / преблаженне Гаврииле, / мы же святых мощей твоих обретение празднующе, / с верою и любовию взываем: / моли Христа Бога, // да сотворит нас победители греха и храмы Духа Святаго.

НА УТРЕНИ

На Бог Господь: тропарь дважды. Слава, и ныне, Богородичен воскресный.
По 1-м стихословии седален, глас 8.
Притицем, вернии людие, / облобызаем священное сокровище, / многоцелебныя мощи преподобнаго Гавриила, / милостию. Божией нам явлнныя // и источающия нам ныне велия чудеса.

Слава, и ныне, Богородичен:
Небесная поют Тя, Обрадованная Мати Безневестная, / и мы славословим неизследованное Твое Рождество, Богородице, // моли спастися душам нашим.

По 2-м стихословии седален, глас 8.
Воина Христова непобедимаго, / тя вси, вернии, ублажаем, преподобных доброто, // любовию празднующе святую память твою, Гаврииле всечудне.
Слава, и ныне, Богородичен:
Дево Пречистая, спаси ны молитвами Твоими, / движущи утробу матернюю, // Сыну Твоему и Богу нашему.

По полиелее седален, глас 8.
Приидите, православных собори, / стояще в Доме Бога нашего, / песньми хвалебными ликующе прославим / лика преподобнического звезду новосветлую, / добродетелей преукрашенное жилище, / чудес и исцелений источник неоскудевающий, / Христа со Отцем и Духом обеталище боголепное, / преподобного и богоблаженного Гавриила, // да его молитвами подаст нам Господь вся потребная ко спасению.

Слава, и ныне, Богородичен:
Горы Афонския неусыпная хранительница, / иноков Игумения Всечестная, / Преблагословенная Богородице Дево, / о мире всем присная молитвенница, / предстательствует о нас пред Сыном Твоим, // да подаст нам вся потребная ко спасению.

Степенна, 1-й антифон 4-го гласа. Прокимен, глас 4: Честна пред Гоеподем / смерть преподобных Его, Стих: Что воздам Господеви о всех, яже воздаде ми? Всякое дыхание: Евангелие от Матфея, зачало 43.

По 50-м псалме, стихира,глас6:
Душу и сердце открыл еси благодати, / отче преблаженне Гаврииле, / потом трудов своих разжеглся еси, / и слезами молитв своих очистился еси,| яко злато в горниле, / дом Духа Божественнаго обрелся еси / и ублажаешися ныне, // яко молитвенник о душах наших.

Канон
Канон Богородице со ирмосом на 6 и преподобнаго на 8, глас 8.

Песнь 1.
Ирмос: Посеченный несекомого пресене, / и виде солнце землю, юже не виде; / лютаго врага вода потопи, / и непроходимое пройде Израиль. / песнь же воспевашеся: // Господеви поим, славно бо прославися.
Поем Господеви, прославляемому во святых и даровавшему нам таковаго молитвенника и теплого предстателя, посетившаго милостию люди своя, яже стяжал еси, славно бо прославися.
Помощника и Покровителя в житии своем Господа избрал еси, отче преблаженне Гаврииле, и всем сердцем к Нему Единому усердно прилепился еси; подвиги и труды своими стерл еси страстей супостаты, вопия Богу своему, славно бо прославися.
Господу работати вожделев, во обитель святую вселился еси, отче Гаврииле, и бысть ти во спасение. Прошед же жития сего море, введе тя Господь в небесное жилище, еже уготова любящим Его, идеже ты ныне Триипостасному Божеству поеши, славно бо прославися.
Богородичен: Прелестию праматернею человекоубийца вверже ны в море лютых бед и страстей; Тобою же, Дево Чистая, избавлении от работы чуждаго, Спасителю и Богу нашему поем, славно бо прославися.
Песнь 3.
Ирмос: Утвердися сердце мое во Господе, / вознесеся рог мой в Бозе моем, / разширишася на враги моя уста моя, // возвеселихся о спасении Твоем.
Сердцем своим чистым узрел еси Бога, отче богоносне Гаврииле, и творил еси суд и правду посреде земли, поя Ему выну: Свят еси Господи.
Молитвою и богомыслием ум и сердце твое в Горняя вперивый, отче Гаврииле, и, еще на земли суща, купно с тезоименным небесным
благовестником воспевал еси благодарственне Христу Богу: Свят еси Господи.
Утвердися сердце твое во Господе, и любы твоя излияся преизобильно на люди тебе врученныя, упасл еси я жезлом кротости и правды, и явился еси домочадец усердный Владыки своего, на всяко время благоговейно взывая: Свят еси Господи.
Богородичен: Преестественно заченши, Богоотроковице, Владыку и Творца Своего, прозревая страшное сие и спасительное таинство, из глубины сердечней воспевала еси кротце Христу Богу Твоему: Свят еси Господи.
Седален, глас 2.
Земли Русския благое прозябение, / горы Афонския доброе произрастание, / Церкви Православныя цвете благоуханный, / Небесного вертограда маслина доброплодная, / Гаврииле отче священнейший, // величаем тя, молитвенника о душах наших.
Слава, и ныне, Богородичен:
Афонския горы Игумение Всечестная, / Пречистая Дево Богородице, / помяни удел Твой и люди Твоя, // щедроты и милости нам велия даруя.
Песнь 4.
Ирмос: Пророк Аввакум умныма очима / провиде, Господи, пришествия Твоя, / тем и вопияше: / от юга прииде Бог, // слава силе Твоей, слава снизхождению Твоему.
Немощи человеческия презрев, отче люботрудне Гаврииле, неленостно Христу поработал еси, выну со пророком взывая: Господь Бог мой сила моя и учинит нози мои на совершение, слава силе Твоей, Господи.
Украситель обителей Божиих и храмоздатель всеусердный явился еси, отче Гаврииле, присно радуяся и веселяся о Бозе Спасе твоем, взывая Ему: слава силе Твоей, Господи.
Услышал еси слух Господень, преподобие Гаврииле, и последовал еси Христу, труды и песньми непрестанно славяще Его: Боже, разумех дела Твоя, слава силе Твоей, Господи.
Богородичен: От Бога Отца безлетно рождаяся, Превечное Слово, от Девы Чистыя воплощение приял еси, Боже, и изшел еси на спасение людей Твоих, спасти помазанныя Твоя пришел еси; слава силе Твоей, Господи.
Песнь 5.
Ирмос: Мрак души моея разжени, Светодавче Христе Боже, / началородную тьму изгнав бездны, / и дару ми свет повелений Твоих, Слове, // да, утренюя, славлю Тя.
Беды и козни бесовския кротко претерпевающе и пламя злобы и клеветы человеческия росою миролюбия твоего угошающе вопиял еси: Господи Боже наш, мир Твой подаждь нам.
Огнь молитвы твоея супостаты мысленный попали, отче блаженне, и сладчайшее имя Божие именующе, во глубине сердца твоего непрестанно взывал еси: Господи Боже наш, мир Твой подаждь нам.
О братии и пастве твоей всегда рачение имеюще и о отечестве твоем присно моляся, среди нощи афонстей духом утреннююще взывал еси: Господи Боже наш, мир твой подаждь нам.
Богородичен: Вратом затворенным преестествено прошел еси, Владыко, нерушив Девства Твоея Пречистыя Матери, Юже даровал еси роду нашему Предстательницу и Помощницу, воплотивыйся нас ради, Господи Боже наш, молитвами Ея мир Твой подаждь нам.
Песнь 6.
Ирмос: Иону в ките, Господи, / единаго вселил еси, / мене же, связаннаго мрежими вражиими, // яко от тли онаго, спаси.
Похоть плоти и очес, таже гордость житейскую отринувше, отче добропобедне Гаврииле, мертв был еси миру сему и сораспялся еси возлюбленому, изводящему от тли Живодавцу.
Праздность духа и плоти отвергнувши, отче преподобие, смиренномудрием сокрушил еси презорливаго прелестника, победную песнь поюще изводящему от тли Живодавцу.
Возлюбил еси благолепие церковное, блаженне, и о славе Божией ревнующе, показался еси храмоздатель радетельный, призывающе всех ко славословию изводящем от тли Живодавцу.
Богородичен: В скорбех, находящих на ны, возопием к Тебе, Богоблагодатная Владычице, услыши нас, под Кров Твой честный прибегающих и поклоняющихся спасшему нас от смерти и изводящему от тли Живодавцу.

Кондак, глас 1.
Стяжал еси дух мирен в житии твоем, / пожил еси желанием Божественным и любовию Господа твоего, / Гаврииле преблаженне, / от Него же венец приял еси, / и Христу со ангелы предстоя, // моли спастися нам.

Икос:
Возрадовастася сердце твое и плоть твоя о Бозе Живе, / преблаженне отче Гаврииле, / егда предображение сладости пребывания во дворех Отца Небеснаго / в пещерах Киевских ощутил еси; / вселением же в гору афонскую, / восхождение в горняя в сердце своем положи, / и, Духом водим, возрастал еси от силы в силу, / и явился еси в ризах светлых пред Господем в превыспреннем Сионе, / идеже ныне Ему с лики святых предстоищи, // моляще спастися нам.

Песнь 7.
Ирмос: На поле Деире / иногда мучитель пещь постави на мучение Богоносных, / в ней же три отроки песнословяху / Единого Бога, троично воспеваху, глаголющи: // отец Боже, благословен еси.
Хваление приносим ти, отче приснопамятне, прославляюще добродетели и подвиги твоя, яже совершил еси силою Христовою, поюще Ему благодарне: благословен еси, Господи Боже отец наших, препетый и превозносимый во веки.
В горе афонстей виталище себе обрел еси, отче всехвальне Гаврииле, и о Отечестве своем пестунствуя, землю Российскую храмы и святынями вельми украсил еси, воспевающе благодеющему Богу: благословен еси в храме святыя славы Твоея, препетый и превозносимый во веки.
Алтаря Господня служителю благоговейный, отче богочестне Гаврииле, Троицу Святую духом, яко ангел выну созерцающе, вопиял еси: благословен еси на Престоле славы Царствия Твоего, препетый и превозносимый во веки.
Богородичен: Ложесна Твоя, Богородице Владычице, прияша Егоже небо всуе вместити тщашеся. Мы же земнороднии низхождению Божию радуюшеся, взываем ликующе: благословен еси на тверди небесней, препетый и превозносимый во веки.

Песнь 8.
Ирмос: Покрывая водами превыспренняя Своя, / полагали морю предел песок / и содержай вся, / Тя поет солнце, Тя славит луна, / Тебе приносит песнь вся тварь, // яко содетелю всех во веки.
Евангелие доброгласно проповедавый, тезоименному благовестнику уподобился еси, отче богомудре; мы же, просвещении светом исправлений твоих, видяще добрыя и славныя подвиги твоя, прославляем Отца Небеснаго, глаголюще: Господа пойте дела и превозносите во вся веки.
Неописанному Творцу всяческих ,и Спасителю Богу нашему купно с премирными лики благодарственно воспевал еси: Господа пойте дела и превозносите во вся веки.
Изнесл еси из сокровища сердца твоего добрая и соделался еси Троицы честное жилище, богоносне отче Гаврииле, ныне же со ангелы на небеси ликующе, подвизаеши ны пети: Господа пойте дела и превозносите во вся веки.
Богородичен: Единородному Слову Безлетнаго Отца, вочеловечшемуся от Девы и воскреснения даровавшему роду человеческому, славословие приносим: Господа пойте дела и превозносите во вся веки.

Песнь 9.
Ирмос: Благословен Господь, Бог Израилев, / воздвигнувый рог спасения нам / в дому Давидове, отрока Своего, / в них же посети нас Восток с высоты // и направил ны есть на путь мира.
Илии огнеколесничнику уподобляяся, ревнуя поревновал еси по Господе Бозе Вседержителе, обители афонския расширивши и благочестие
умноживши, стяжал еси нетленный славы венец и ублажаешися ныне с лики святых.
Любоблагоутробне авво Гаврииле, призре Господь на смирение и простоту сердца твоего и сотвори тебе величие в Церкви Своей Святей, сего ради ублажаешися ныне с лики святых.
Иноком наставника, игуменом добропопечительное правило, священства Христова велелепное украшение, воспеваем тя, отче треблаженне, и ублажаем ныне с лики святых.
Богородичен: Истощивый Себе нас ради, Спасе наш Господи, благословен еси, яко посети и сотвори избавление людем Твоим, и Матерь Твою, Деву Чистую, даровал еси роду нашему неусыпную молитвенницу, Юже присно боголепно ублажаем с лики святых.

Светилен:
Отче богопросвещенне Гаврииле, Трисиятельнаго Божества жилище, память твою светоносную совершающих, помяни у Престола Светодавца Господа, да просветит нас повелении Своими.

Слава, и ныне, Богородичен:
Заре нетварнаго присносущаго Солнца, Пречистая Богородице Дево, молися из Тебе Воплощенному, да просветит нас повелении Своими.

На хвалитех стихиры, глас 2.
Днесь град Одесса веселия исполняется, / яко многоценное сокровище мощи твоя восприимше, / и люди православныя пение ти приносят, глаголюще: / радуйся, Гаврииле всеславнейший, / целебниче и чудотворче премилостивый, / града нашего неусыпный хранителю // и молитвенниче усердный о душах наших.
Днесь гора афонская радостно ликует, / прославляюще отрасль свою всекрасную, / Гавриила преподобнаго и треблаженнаго, / и монашествующих лицы сице взывают: / радуйся, отче наш Гаврииле / покаяния образе и учителю чистоты, / храмостроителю прехвальный и всепетый // и молитвенниче усердный о душах наших.
Днесь вселенная вся благодати лучами просвещается, / память совершающе дивнаго Гавриила, / людем православным скораго в скорбех помощника, / чудотворца изряднаго и милостиваго // и молитвенника усерднаго о душах наших.
Днесь песни священныя /чада твоя духовная ти воспевают, / отче Гаврииле всеблаженне / и любовию от бед и искушений сохраняемии, / память твою веселием совершают / и во умилении молят тя: / поминай нас у Престола Вседержителя, / отче наш милостивый, пастырю наш добрый // и молитвенниче усердный о душах наших.

Слава, глас 6. Подобен: Тридневен:
Ликуй ныне, богоспасаемый граде Одессо, / яко лучами солнечными просвещаемый чудотворным Образом Касперовским; / се бо богомудрый Иннокентий / со твердым во мучении Анатолием, / пречудный Гавриил-храмостроитель / и дивный в чудотворениих Иона, / со преподобным отцем Кукшею, / яко звезды небесныя сияющи, / присно молятся спастися граду нашему / и всем верою живущим в нем.

И ныне, глас6:
Величаем/Тя, Богородице Дево, / возвеличившую род наш, / из Тебе бо воплотися Избавитель Господь / и родися яко Младенец млекопитаемый, / Сый Бог наш, // спасаяй присно Тя величающия.

Славословие великое, и отпуст, и час 1-й.

НА ЛИТУРГИИ

Блаженны от калена преподобнаго, песни 3-я и 6-я. Прокимен, глас 7: Честна пре Господем / смерть преподобных Его. Стих: Что воздам Господеви о всех, яже воздаде ми? Апостол к Галатом, зачало 213. Евангелие от Луки, зачало 24. Причастен: В память вечную: